" مولوتوف " الزوّالي ..
بقلم المسرحي نور الدين الورغي
عـرْيانْ
بلا حــوالي
لا والي
لا تالي ..
ضَــحّاكْ
فدْلاكْ
عاشق الكـلـمة
الـنّـغْـمة
الفـخـذ ولَـوْراكْ..
لا عَـنّـقْ
لا باسْ
لا شاف زنــودْ
كُــلّـو في الــكـاسْ
في الجّـــونْـتَـة
في الـبـونْـتَـة
في دوّيـــخـة الرّاس..
لا عرف فَـرْحَـة
لا طـفْـلة لا بسة الطَّــرْحَـة
لا تـزغْــريطَــة
لا عــيـطَـة
لا طَـبْـلة لا غــيـطَـة..
لا هَــزْ قـنْــبـلـة
لا " كالاشْ "
لا صَــلّى
لا سِـتّــة من سُــطّاشْ ..
يـبـاتْ الـبَــرّة
لا عرف مــخَــدّة
لا سِــرّة
بسكّــيـنَـة حافية
تـقَـصّـت الـصُّــرّة..
الـهَـمّ وراه
جاب الــجُّــرّة..
في الحومة عاشْ
الجـوع ياقوتْ
والدّمْــعَـة دُرّة..
سمع بالـفَــزْعَة
خرج مع النّاسْ
عَـيّط بالصوتْ
يــنَــحّـيشْ الزّلْـعَـة..
ضحك وتــمَـنّى
صـبَرْ واسْــتَــنّـى
شــعْـلــتْ النّارْ
وهــرْبــتْ الـجـــنّـة..
قال نــحـبّك
تونس يا خــضراء
لــوقْــتــاشْ نــعـانــي
ومن هَـــمّـي نَـــبْــرا ؟
المصدر: الجمهوريّة
0 تعليق:
إرسال تعليق